Flytt til Eiksund
Sørvende tomter med panoramautsikt over øya Eika og Sunnmørsfjella. Ei lita bygd med stort hjarte — trygge oppvekstvilkår, kort veg til sjø og fjell, og eit fellesskap som tek godt imot nye naboar.
Livet på Eiksund
Kva ventar deg?
Eiksund er ei lita bygd ytst i Ulstein kommune på Sunnmøre. Her lever ein tett på sjø og fjell, med korte avstandar til alt du treng — men langt nok unna til at kvardagen er roleg.
Fjord og natur
Fiske, båtliv, padling og bading rett utanfor døra. Turstiar og fjellturar for heile familien.
Trygg oppvekst
Ein god plass for born å veksa opp — trygge vegar, mykje uteliv og mange leikekameratar i nabolaget.
Kort veg til alt
Ulsteinvik på ti minutt, resten av Søre Sunnmøre innan ein halvtime — sjå avstandane under.
Bustadmarknad
Ledige bustadar
Bustadar til sals i og rundt Eiksund, henta frå finn.no.
Bustadfelt Johanmarka
Ledige bustadtomter
Feltet Johanmarka ligg i idylliske Eiksund med panoramautsikt over øya Eika og Sunnmørsfjella. Tomtene er sørvende og er frå ca. 800 m² til 1200 m² store — god plass til hus, hage og born som vil ha rom å springe på.
Pris
- Tomtepris: 380 kr per m²
- Sakshandsamingsgebyr: 20 000 kr per tomt
Ei tomt på 1000 m² kostar såleis om lag 400 000 kr inkludert sakshandsamingsgebyr.
Handgiving og tildeling
Tomter merka med "tomtenr" på kartet er klare for sal. Nokre kan vere handgitt (reserverte). Er du interessert i ei handgitt tomt, kan du søke om tildeling — den som har reservasjonen får to vekers frist til å bestemme seg. "S" tyder at tomta er seld eller formelt tildelt.
Sentralt på Søre Sunnmøre
Alt innan pendleavstand
Sjølv om Eiksund kjennest som ei roleg bygd ved fjorden, ligg vi midt i smørauget av Søre Sunnmøre. Etter at Eiksundsambandet opna i 2008 har alle kommunesentera i regionen blitt naboar — du kan bu landleg og likevel pendle til jobb, skule eller handletur på kort tid.
- Ulsteinvik10 min
- Hareid20 min
- Ørsta20 min
- Volda20 min
- Fosnavåg25 min
- Larsnes25 min
Køyretider er omtrentlege ved normale køyreforhold.
Skule og barnehage
Trygg oppvekst i nabobygda
Både barnehage og barneskule ligg i Haddal, den næraste bygda til Eiksund — berre nokre få minutt med bil eller skulebuss. Små, oversiktlege einingar der ungane blir sett kvar dag, og der nye born raskt finn seg til rette.
Blåtinden Barnehage
Den næraste barnehagen ligg i Haddal, med naturen som næraste nabo. Ein triveleg barnehage der ungane får bruke kroppen ute i skog og mark, samstundes som dei lærer og leikar i trygge omgjevnader.
blaatinden.barnehage.noHaddal Skule
Haddal skule er den næraste barneskulen for born frå Eiksund — ein liten og oversiktleg 1.–7. skule i Ulstein kommune. Kort skuleveg, gode uteområde og eit tett samarbeid mellom skule og heim.
ulstein.kommune.no/skule/haddal-skuleUngdomsskule og vidaregåande skule finn du i Ulsteinvik, med skuleskyss frå bygda.
Sjå bygda
Bulyst Eiksund og Haddal
Film frå området, laga av Blåtind Fotografikk på initiativ frå Bulyst Eiksund og Haddal.
Nysgjerrig på å flytte hit?
Ta gjerne kontakt med bygdelaget — vi svarar gjerne på spørsmål om bygda, skule og barnehage, eller kva som skjer her ute.